Abatemera inkingo za COVID-19 bahize guhangana na Perezida Macron wavuze ko “atazabarohera”

Abatemera inkingo za COVID-19 mu Bufaransa bakoze imyigaragambyo karundura ndetse batangaza ko biteguye guhangana na Perezida w’iki gihugu, Emmanuel Macron wavuze ko “ashaka gushyiraho amabwiriza ataboroheye” ku buryo bazava ku izima bakikingiza.

Ku wa Gatandatu tariki 8 Mutarama 2021, nibwo abarenga ibihumbi 100 bahuriye mu mihanda yo hirya no hino muri iki gihugu mu myigaragambyo yo kwamagana icyemezo cya Guverinoma cyo kurushaho gukaza amabwiriza aheza abatarikingije COVID-19 mu bikorwa bimwe na bimwe.

Inteko Ishinga Amategeko y’u Bufaransa iherutse kwemeza umushinga w’itegeko ugena ko nta muturage uzongera kwemererwa kujya muri restaurant no gukora ingendo zihuza imijyi igihe atarikingije COVID-19.

Guverinoma y’iki gihugu ivuga ko iri tegeko rizatangira kubahirizwa bitarenze tariki 15 Mutarama 2022.

Iri tegeko ryarakaje abatemera inkingo muri iki gihugu ndetse uburakari bwabo butizwa umurindi n’amagambo Perezida Macron yavuze mu mpera z’iki cyumweru.

Perezida Macron yavuze ko ashaka gutuma abadakingiye COVID-19 bo mu Bufaransa bagorwa n’ubuzima.

Yabwiye ikinyamakuru Le Parisien ati “Rwose ndashaka kubabangamira, kandi tuzakomeza gukora ibi kugeza ku mpera”.

U Bufaransa ni kimwe mu bihugu byugarijwe cyane na COVID-19 kuko imaze guhitana abarenga ibihumbi 123 mu gihe abarenga miliyoni 11 bayanduye.

Nubwo bimeze gutya, muri iki gihugu hagaragara umubare munini w’abantu batemera inkingo z’iki cyorezo.

Mushobora kudukurikirana ku mbuga nkoranyambaga zacu mukajya muba aba mbere mu kubona amakuru agezweho buri munsi.Kanda hano udukurikirane kuri Facebook, Kanda hano udukurikirane kuri Twitter cyangwa ukande hano ukore subscribe kuri Youtube

Leave a Reply

Your email address will not be published. Required fields are marked *