Gikundiro ikipe ya rubanda nyamwinshi Rayon Sports yakuriweho kuzakina amajonjoro y’ibanze atuma amakipe ajya mu matsinda CAF Confederation Cup 2023/24,kubera ko yashyizwe mu makipe 12 yabonye umusaruro mwiza hagati ya 2017 na 2018 mu marushanwa ategurwa n’Impuzamashyirahamwe ya Ruhago muri Afurika, CAF.
Ikipe ya Rayon Sports itegereje ikipe izava hagati ya Kakamega Homeboys yo muri Kenya na Al Hilal Benghazi yo muri Libya mu kindi cyiciro Ikipe izatsinda hagati y’izi zombi izacakirana na Rayon Sports mu ijonjora rya kabiri, ari na ryo rizatanga ikipe izahita ikomeza mu matsinda ya CAF Confederation Cup.
Andi makipe yasonewe gukina iki cyiciro ni RS Berkane, USMA, Rivers United, Zamalek, Future FC, Club Africain, KCCA, St Éloi Lupopo, Diables Noires, GDSE na Supersport United.
Iyi mikino iteganyijwe kuba hagati yo ku wa 18 na 20 Kanama hakinwa ibanza mu gihe iyo kwishyura yashyizwe ku wa 25 na 27 Kanama 2023.
Rayon Sports yakatishije itike yo gukina CAF Confederation Cup ya 2023/24 nyuma yo kwegukana Igikombe cy’Amahoro, itsinze APR FC igitego 1-0.
Rayon Sports ikomeje kwiyubaka mu kwitegura umwaka w’imikino utaha urimo imikino y’imbere mu gihugu n’iyo hanze ya Afurika. Kugeza ubu Gikundiro imaze gusinyisha abakinnyi batandukanye barimo Umunya-Maroc Youssef Rharb; Abagande Simon Tamale urinda izamu na Charles Baale uritaha; Umunye-Congo, Jonathan Ifunga Ifasso, Umurundi Aruna Moussa Madjaliwa n’Abanyarwanda barimo Serumogo Ally, Nsabimana Aimable na Hakim Bugingo.
Kanda hano udukurikirane (Follow) kuri Facebook Page yacu, cyangwa ukande hano ukore subscribe kuri Youtube Channel yacu.
Tubafitiye n’ibitabo by’abana iby’ikinyarwanda , igifaransa n’icyongereza . Uramutse wifuza kugurira umwana wawe igitabo watwandikira kuri : sopublishers@gmail.com cyangwa ukaduhamagara kuri : Tel: +250783203433,, +25078339990
