Minisitiri w’Ubuzima mu Rwanda, Dr Ngamije Daniel yatangaje ko icyorezo cya Covid-19, cyamaze gufata intera iri hejuru cyane ndetse mu gihe hatabaho ubwirinzi no gufata inkingo kw’Abaturarwanda bishobora kuba bibi kurushaho.
Atangaza ibi mu gihe imibare y’abandura Covid-19, ikomeje gutumbagira bitewe n’ubukana bwa virusi yihinduranyije ya Omicron. Nk’ubu mu masaha 24 yashize ku wa 29 Ukuboza 2021, abantu 2.083 banduye Covid-19.
Muri rusange kugira ngo bigaragare ko igihugu kiri mu bihe bikomeye byo guhangana na Covid-19, ni uko nibura kiba kiri hejuru ya 50/100000 mu bwandu.
Ni mu gihe mu byumweru bine bishize bari kuri 5/100000.
Mu kiganiro n’abanyamakuru cyo kuri uyu wa Kane, Minisitiri w’Ubuzima, Dr Ngamije Daniel yagize ati “Dusesenguye turabona ko twageze mu cyiciro cy’aho icyorezo kiba cyamaze gufata intera iri hejuru.”
Minisitiri Ngamije yavuze ko muri iki gihe icyorezo kiri ku muvuduko udasanzwe ugeranyije n’ibindi bihe byigeze kubaho.
Ati “Ni ikigaragaza ko Omicron ifite umwihariko wo kwandura cyane. Kandi namwe murabibona hirya no hino hari abantu barwaye Covid-19, urahura n’umuntu umwe cyangwa babiri ugasanga bararwaye bitandukanye n’uko byari bimeze mbere.”
Ni ngombwa urukingo rushimangira…
Minisitiri Dr Ngamije yavuze ko uko gutanga urukingo rushimangira ari ukugira ngo umuntu yongere agire ubudahangarwa bw’umubiri bityo abasirikare biyongere babashe guhangana na virusi igiye uwo muntu yaba ahuye na yo.
Ati “Ishingiro ryayo ni uko, uko umuntu akingirwa akagira abasirikare mu mubiri […] nyuma y’amezi atandatu amaze gufata doze ya kabiri abasirikare bagenda bagabanuka.”
Yavuze ko hari abakoreweho ubushakashatsi mu bari barakingiwe nyuma y’amezi atandatu bigaragara ko abasirikare b’umubiri bagenda bagabanuka.
Minisitiri Dr Ngamije yashimye ko nibura Abanyarwanda bakomeje kwitabira uru rukingo rushimangira kuko kuri ubu abamaze kuruhabwa barenga ibihumbi 150.
Mushobora kudukurikirana ku mbuga nkoranyambaga zacu mukajya muba aba mbere mu kubona amakuru agezweho buri munsi.Kanda hano udukurikirane kuri Facebook, Kanda hano udukurikirane kuri Twitter cyangwa ukande hano ukore subscribe kuri Youtube
