Robert Lewandowski Rutahizamu wa Bayern Munich n’Ikipe y’Igihugu ya Pologne, yatowe nk’umukinnyi mwiza w’umwaka wa 2021 ku Isi, igihembo cya FIFA yahawe ku nshuro ya kabiri yikurikiranya.
Muri ibi bihembo by’umwaka by’Ishyirahamwe ry’Umupira w’Amaguru ku Isi (FIFA) byatangiwe i Zurich ku wa Mbere tariki ya 17 Mutarama 2022 ni ho Lewandowski yatangarijwe nk’uwatsinze, aho yahigitse Lionel Messi na Mohamed Salah.
Rutahizamu Robert Lewandowski yisubije iki gihembo nyuma yo kugira umwaka mwiza wa 2021, aho yatsinze ibitego 69.
Yagize ati “Murakoze cyane. Nishimiye gutwara iki gihembo kandi ndumva binteye ishema. Ndabizi ko ari icya bagenzi banjye dukinana n’abatoza. Twese dukora cyane kugira ngo dutsinde imikino. Ni iby’agaciro gukorana n’aba bantu bankikije.”
Muri uyu muhango, rutahizamu wa Manchester United na Portugal, Cristiano Ronaldo, yahawe igihembo cyihariye kuko yabaye umukinnyi watsinze ibitego byinshi mu mikino mpuzahamanga.
Mu bagore, umukinnyi w’umwaka yabaye Alexia Putellas wa FC Barcelone yo muri Espagne.
Ibihembo byatanzwe:
- Umukinnyi mwiza mu bagabo: Robert Lewandowski (Bayern Munich na Pologne)
- Umukinnyi mwiza mu bagore: Alexia Putellas (Barcelone na Espagne)
- Umutoza mwiza mu bagabo: Thomas Tuchel (Chelsea)
- Umutoza mwiza mu bagore: Emma Hayes (Chelsea)
- Umunyezamu mwiza mu bagabo: Édouard Mendy (Chelsea na Sénégal)
- Umunyezamu mwiza mu bagore: Christiane Endler (Lyon na Chili)
- Igihembo cyihariye mu bagabo: Cristiano Ronaldo (Manchester United, Juventus na Portugal)
- Igihembo cyihariye mu bagore: Christine Sinclair (Portland Thorns na Canada)
- Igitego cy’umwaka: Erik Lamela (Arsenal vs Tottenham Hotspur)
- Umufana w’umwaka: Denmark na Finland
- Igihembo cyo koroherana (Fair Play): Denmark
Ikipe y’umwaka mu bagabo:
Umunyezamu: Gianluigi Donnarumma (AC Milan, Paris Saint-Germain)
Ba myugariro: David Alaba (Bayern Munich, Real Madrid), Leonardo Bonucci (Juventus) na Ruben Dias (Manchester City).
Abakina hagati: Kevin De Bruyne (Manchester City), Jorginho (Chelsea) na N’Golo Kante (Chelsea).
Ba rutahizamu: Cristiano Ronaldo (Juventus, Manchester United), Erling Haaland (Borussia Dortmund), Robert Lewandowski (Bayern Munich) na Lionel Messi (Barcelone/Paris Saint-Germain).
Ikipe y’umwaka mu bagore:
Umunyezamu: Christiane Endler (Paris Saint-Germain, Lyon)
Ba myigariro: Millie Bright (Chelsea), Lucy Bronze (Manchester City), Magdalena Eriksson (Chelsea) na Wendie Renard (Lyon).
Abakina hagati: Estefania Banini (Levante, Atletico Madrid), Barbara Bonansea (Juventus) na Carli Lloyd (NJ/NY Gotham).
Ba rutahizamu: Marta (Orlando Pride), Vivianne Miedema (Arsenal) na Alex Morgan (Tottenham Hotspur, Orlando Pride, San Diego Wave).
