Irushanwa rya Miss World ryagombaga gusozwa mu ijoro ryo kuri uyu wa Kane tariki 16 Ukuboza 2021 ryasubitswe kubera ubwandu bwa Coronavirus bwakajije umurego mu bari guhatana.
Mu itangazo ryashyizwe hanze na Julia Morley, uhagarariye iri rushanwa yatangaje ko barisubitse mu minsi 90 iri imbere ngo barengera ubuzima bw’abari guhatana ndetse n’abandi bafitemo akazi.
Hari aho yagize ati “Miss World 2021 yasubitse by’agateganyo gusoza irushanwa ryagombaga kwerekwa Isi yose riri kubera muri Puerto Rico kubera inyungu z’umutekano by’abahatana, abakozi n’abaturage muri rusange. Irushanwa rizaba muri Puerto Rico Coliseum José Miguel Agrelot mu minsi 90 iri imbere.”
Iri rushanwa ryasubitswe nyuma yaho abakobwa 17 basanzwemo Coronavirus. Mu 2020 ryagombaga kuba ariko kubera iki cyorezo nabwo ntiryaba, bituma Umunya-Jamaica Toni-Ann Singh akomeza kwambara ikamba yegukanye mu 2019.
Ingabire Grace ni we uri ahagarariye u Rwanda muri Miss World y’uyu mwaka yabaye isubitswe.
Mushobora kudukurikirana ku mbuga nkoranyambaga zacu mukajya muba aba mbere mu kubona amakuru agezweho buri munsi.Kanda hano udukurikirane kuri Facebook, Kanda hano udukurikirane kuri Twitter cyangwa ukande hano ukore subscribe kuri Youtube
